A néva! - Mirko Archimede Bianchini

A néva!

A néva! A néva! A néva!
i sbraien i putein, i ragazô
gnand fóra de spinta da la scóla
cun el scierpi svulazanti pr'aria.
I córren sàtta ai fioch ed néva
chi caschen alzér, mulsein,
damand el piómmi ed pulsein.
A néva! A néva! A néva!
I vérs i scapen d'in via in via
perdandes pr'al bianch sileinzi
damand al piulèr di passaròt.
Chi birichein ed chi ragazô
cun el bali ed néva i fan bataglia;
i ciàpen fogh in ghégna,
i brùsen tott ed felizitê.
Fiûu, fiûu i s'céflen el bali :
plaff ! zò in d'la scheina,
in del tràzzi al veint del ragazóli.
D'in strèda in strèda
l'è tott un fermeint ed gioventù.
Me a stagh in cà, schizê
countr'a un véder dai ricam zlê;
a guerd tott stê bianch fràdd:
fràdd damand al mê cór striflê
e a peins che un'et'r ân l'è passê;
che seimper piò luntân l'è cl'étê
quand anca me a psiva sbraier cunteint
A néva! A néva! A néva!