Ediziòun straordinaria - Euro Carnevali

Ediziòun straordinaria

Terminato l'ultimo conflitto mondiale, con l'affermarsi della radio-televisione, le « edizioni straordinarie » dei quotidiani, si fecero sempre più rade, fino a scomparire, assieme agli ultimi strilloni di giornali. L'autore, rievoca quei tempi, che ci riportano ad un'epoca e ad un costume, i quali sembrano già tanto lontani.

L'Italia in Abissinia la s' dèva un gran dafèr
per psér, 'na bòuna volta l'Impero conquistèr !
I eren qui i tèimp, circa dal treintasé . ..
Alora 'na gran lòta i la fèven anch i giornê,
che in d'la stàsa giurnèda i tireven tré ediziòun
e tot i andèv'n'a ruba secand el previsiòun !
A Modna, quand vers sira a gniva fora la «Gazata»
i nòster giornalèr, chi a pê, chi in biciclàta,
i tachèven la corsa squasànd pr'aria al giornèl
partand da via Falòpia, diret vers al crusèl :
schivand tranvai e machin in berba ai pizardoun
ognun vliv'esr'al prèm a vànder l'edizioun !
Di sbrài a gola avérta ! l'é fràsca, sol rivèda !
gli italiani sono a Gondar ! Dire Daua cunquistèda !
Am sàmbra ancàra ed vàder ... al gróp di giornalèr
soquant puvràt, i en mort... lasèmi mò arcurdèr . ..
Mescoli, Stecchi, l'Adriana, cunfús in mez al móc
i riv'n'in dal crusèl a forza ed còc e bóc ;
... mo' la Rosina sè, la i supereva tót... !
Al giornèl la dèva a volo ai tranvier opur ai spròch
chi pasèven pò a l'edicola a dèregh i sô baioch.
Sti quèi i m'en suvgnú soquanti dmangh'indré
vdànd la Rosina a sèder in mez ai sô giornê
« 'Sa volel », la m'ha det, « quasta l'è 'na passiòun
anch se, magari, adèsa as viv sèinza emoziòun ;
al sà, el nutézi in « tele » el van piò fort ed l'aria ;
i en pasè chi tèimp ed la « straordinaria » !
Adèsa un sol giornèl al fa dó o tre ediziòun ...
forse, al m'ha già capî. .. qual 'd'la televisioun ».